ГЛАВА XXIII

О стрелцах

а в ней 3 статьи

1. Стрелцов во всяких делех, опричь розъбою и татьбы с поличным, судити и управа межь ими чинити в Стрелецком приказе. А почему у стрелцов сь их исков по судным делам пошлин имати, и то писано выше сего.

2. А будет которому стрелцу чего искати на стороннем человеке в и(ы)ном приказе, и ему того своего иску на стороннем человеке искати в и(ы)ном приказе по подъписным челобитным из Стрелецкого приказу. А бес подписных челобитен стрелцом ни в котором приказе ни на кого ни в чем суда не давати. А будет кто учнет на стрелце искати встрешно, и на него суд давати в том же приказе.

3. А будет учнет стрелец на стрелце же искати своего и жены своея бесчестья, и доищется, и на виноватом за стрелецкое и жены его бесчестья, по судному делу, правити деньги. А будет которой стрелец учнет бити челом государю, что ему того бесчестья платити нечем, и за то бы бесчестье учинити ему наказанье, и по тому его челобитью велеть ему за то бесчестье учинить наказанье, бить его кнутом, чтобы ему и иным таким не повадно было свою братью стрельцов и их жон бесчестить.